أفضل مطاعم برجر في الاسكندرية

لو بتدور على أحلى مطاعم تاكل فيها برجر في الاسكندرية يبقى انت في المكان الصح! جمعنالك أفضل الأماكن اللي بتقدّم برجر سواء محلات كبيرة او عربيات برجر مميزة وسعرها معقول. وكمان جبنالك عروض مخصوصة لموقعنا مش هتلاقيها في حتة تانية! لو عايز تتابع العروض الحصرية اللي بنجبها من المطاعم تقدر تدخل الجروب بتاعنا على فيسبوك.

أفضل مطاعم برجر في الاسكندرية – Best Burger in Alexandria

قبل ما نبدأ، لازم نقول ان مفيش ترتيب معين على حسب الجودة او الطعم، كلها مطاعم جودتها عالية و بتقدّم برجر مميز يستحق التجربة. يلا بينا نكتشف البرجر ال”Juicy” بجد.

بافالو برجر – Buffalo Burger

بافلو برجر من أشهر مطاعم البرجر مش بس في اسكندرية، ده على مستوى مصر كلها. فروع بافلو منتشرة في القاهرة بأكثر من 25 فرع و في اسكندرية ب 4 فروع في سموحة ومساكن الضباط وكارفور سيتي سنتر وكمان في المندرة. 

بافلو بيتميز ان فيه ثبات ملحوظ في جودة البرجر على عكس مطاعم تانية في اسكندرية. حاجه تانيه بتميز بافلو انك تقدر تختار وزن البرجر اللي انت عايزه اياً كان السندوتش اللي انت مختاره. الأوزان المتاحة بتكون 150 جرام، 200 جرام, او 400 جرام. ومنصحكش تطلب ال400 جرام غير لو جعان جداً😅

اطلب ايه من بافلو برجر؟

 انا شخصياً بحب المشروم جداً فبالتالي طلبي المفضل بيكون واحد من الاتنين دول: شيتيك مشروم (Shiitake Mushroom) او بيكون مشروم جاك (Bacon Mushroom Jack). ممكن برضه تجرّب تشيكن باستر (Chicken Buster) لو عايز فراخ بس انا بفضّل الbeef دايماً من بافلو.

بروكسيز – Bruxie’s

بروكسيز برضه اختيار جامد جداً مش بس للبرجر، بروكسيز عنده مكرونة حلوة جداً من احلى المكرونات اللي دوقتها برة البيت الحقيقة. بروكسيز فيه ميزة غريبة مش هتلاقيها في أي مطعم تاني وهو انه اي حاجه هتطلبها من عنده هتبهرك😅

 بروكسيز بيقدّم برجر ومكرونة وبيتزا وأطباق فراخ وستيك وكمان فطار و بانكيكس وقهوة وكل دول مميزيين جداً في بروكسيز ومش هتحس ان هو متخصص في حاجه معينة من كتر ما كل حاجه فعلاً حلوة جداً. 

بس طبعاً الحلو ميكملش، لأنك هتلاقي ان بروكسيز اسعاره غالية شوية بالنسبة لأغلب المطاعم في اسكندرية. ولكن كطعم اديله 10 من 10 بضمير مرتاح ومنغير أي انحياز.

اطلب ايه من بروكسيز؟

بروكسيز عنده طبق بطاطس غرقان جبنة ولحمة مفرومة وهاليبينو، الطبق ده اسمه سلوبي جو (Sloppy Joe) وبالنسبالي ده أهم طبق لازم تجربه عند بروكسيز. تاني حاجه وبما اننا بنتكلم عن البرجر فلازم برضه تجرّب كيوبان برجر (Cuban Burger) لأن الصوص بتاعه + الرومي المدخن بالنسبالي بيعملو طعم رهيب مع بعض.

هولمز – Holmes Burger

هولمز واحد من مطاعم البرجر اللي حالياً معروف على مستوى مصر بس هو بدايته كانت في اسكندرية. هولمز عنده 9 فروع، 7 منهم في الاسكندرية و 2 في القاهرة. الحاجه اللي بتميز هولمز هي جودة البرجر والصوصات المبهرة اللي بيستخدموها في سندوتشاتهم. 

المفاجأة ان صاحب مطعم هولمز مهندس ولكنه شيف برضه وبيحب يجرّب حاجات جديدة دايماً في الأكل وده اللي بيخلي هولمز عنده صوصات مميزة جداً ومش بتلاقيها في مطاعم تانيه. 

اطلب ايه من هولمز برجر؟

لو انت من محبين البيج تيستي صوص بتاع ماكدونالدز فلازم تجرّب ال يامي برجر (Yummy Burger) من هولمز. وفيه سندوتش عند هولمز انا بعتبره الجوكر ومش بيختلف عليه اتنين في حلاوته وهو ال تشيزي مشروم (Cheesy Mushroom) وده زي ما اسمه بيوحي هو غرقان جبنة ومشروم بس لو مش عايز لغوصة فبلاش عشان الجبنة فيه كتير جداً فعلاً😅

ننصحك بقراءة: أفضل مطاعم مشويات ممكن تجربها في الإسكندرية

BRGR

BRGR هي برجر Truck او “عربية” برجر بس مش العربية الاعتيادية اللي انت فاكرها. BRGR يعتبر اغلى واحد في القائمة دي ولكن بصراحة ثمنه فيه. هو اينعم حجم البرجر مش كبير وممكن تدفع حوالي 250-300 جنيه في الوجبة ومتحسش انك شبعت اوي ولكن جودة البرجر وطعمه يستحق انك تجربه. 

للأمانة برضه مش هقدر اقول ان BRGR احلى واحد في القائمة دي لأن زي ما قلت بالنسبالي سعره غالي على الكمية او حجم السندوتشات اللي بيقدمها. وبعيداً بقى عن البرجر، BRGR بيقدّم حلويات حلوة جداً زي ايس كريم لوتس وده بالنسبالي من احلى الحاجات عنده. 

اطلب ايه من BRGR؟

ممكن تجرّب اتوميك برجر Atomic Burger لو بتحب المشروم زيي. امّا لو عايز تجيب برجر فراخ فممكن تجرّب بافلو تشيكن Buffalo Chicken

ثري بي برجر – 3B Burger

 لو انت من هواة البرجر البيتي وبتدوّر على حاجه طعمها حلو وفي نفس الوقت سعرها معقول يبقى ثري بي برجر ممكن يكون اختيار كويس. ميزة 3B Burger ان اسعاره حلوة بالنسبة لباقي المطاعم الي اتكلمت عليها في المقالة دي. 

اطلب ايه من ثري بي برجر؟

ممكن تجرّب ساندوتش ثري بي برجر 3B Burger او فانكي برجر Funky Burger