أفضل مطاعم سمك في الاسكندرية

مينفعش تيجي اسكندرية من غير ما تاكل أكلة سمك محترمة. عشان كده في المقالة دي جمعنالكم أفضل 5 مطاعم سمك في الاسكندرية من وجهة نظر الأكيلة و عن تجارب شخصية.

أفضل مطاعم سمك في الاسكندرية

الآراء في المقالة دي هي في الاخر آراء شخصية وش كل الناس هيعجبهم نفس المطاعم، بس انا حاولنا نختار الأشهر والي فيه اجماع من آراء ناس كتير على أكلهم. يلا بينا نبدأ.

قرية بلبع للمشويات – Balbaa Village for Grills

بلبع من أشهر مطاعم المشويات في الاسكندرية ومن أقدمهم. بلبع معروف جداً على مستوى الجمهورية و ناس كتير لما بييجوا من محافظات تانية بيبقى أحد وجهاتهم الأساسية هو بلبع. مع ان بلبع مشهور جداً وقديم إلا ان له فرعين بس في الاسكندرية، واحد في سيدي بشر والتاني في بشاير الخير. 

بلبع برضه له فرعين في القاهرة في الشيخ زايد وفي مدينة نصر. عيب بلبع الوحيد بالنسبالي هو ان اسعاره غالية طبعاً نظراً لشهرته الواسعة في الاسكندرية بالتحديد.

أطلب ايه من مشويات بلبع؟

بما اننا بنتكلّم عن الأسماك في المقالة دي فأول حاجه هرشحها هي الجمبري الباتر فلاي. كمان الصبيط سواء مقلي او طاجن فهو برضه من الأطباق الجامدة جداً عند بلبع.

أسماك عروس البحر

أسماك عروس البحر مطعم قديم جداً ومشهور في الاسكندرية. جدير بالذكر ان له فرع واحد بس في الاسكندرية وهو فرع بحري، خلي بالك عشان فيه محلات في اماكن تانية في اسكندرية واخدين نفس الاسم بس المطعم اللي في بحري عند المرسي أبو العباس هو الفرع الأصلي و الوحيد. 

أطلب ايه من أسماك عروس البحر؟

فيه حاجتين بحبهم جداً عند عروس البحر مع ان اي حاجه هتتطلبها من هناك هيبقى طعمها حلو جداً ومميز، بس السمك البربون المقلي مفيش زيه عند عروس البحر. لو عمرك ما دوقت البربون او لو دوقته في اي حتة غير عروس البحر يبقى لازم تجربه هناك. الجندوفلي وبلح البحر برضه من الحاجات المميزة اوي عندهم.

عمر افندي

من أقوى مطاعم السمك في اسكندرية اللي كل اللي جربوه قالو انه تحفة و دايماً بيكون فيه اجماع على جودة وحلاوة الأكل هناك. مطعم عمر افندي موجود في المعمورة وده بالنسبالي عيبه الوحيد انه بعيد عن وسط البلد بس يستحق ان الواحد يروحله مشوار طويل او لو مكسّل تروح ممكن تطلب دليفري من خلال واحد من الارقام دي: 01090199540 –  01024503621. 

أطلب ايه من عمر افندي؟

اولاً كده بالنسبة للمقبلات لازم تجرّب شوربة السي فوود في عمر افندي عشان دي لوحدها حاجه عظمة. كمان الجمبري بطرق عمله المختلفة مميز اوي عندهم، ومتنساش بعد ما تخلص أكل تشرب ليمون نعناع عشان تختم الوجبة بالشكل المظبوط. الحاجه الوحيدة اللي انصحك تبعد عنها لما تطلب من عمر افندي هي المكرونات، هي مش وسيئة ولكن الحاجات التانية اللي في المنيو كلها أحلى بكتير.

أسماك قلعة اللول

مطعم اللول برضه من أشهر مطاعم السمك في اسكندرية واللي مشهور بقعدته اللي صعب تلاقي زيها وكمان جودة الأكل هناك كويسة جداً. المطعم موجود في المكس والقعدة فعلاً تحفة بيكون قدامك منظر يهدّي الأعصاب و الخدمة كويسة بس الأسعار غالية شوية وعادةً بتحتاج تحجز قبل ما تروح. لو مهتم بالفيو والقعدة وانك تحس انك قاعد في مكان سكندري اصيل يبقى أسماك اللول هو الاختيار المناسب ليك. 

بالنسبالي عيب المطعم الوحيد انه بعيد جداً عن بيتي وعن وسط اسكندرية بس غير كده القعدة تستحق المشوار بصراحة.

أطلب ايه من أسماك اللول؟

زي ما قلت الأكل عند اللول حلو جداً بس القعدة والفيو هما اللي مفيش زيهم، ولو هرشحلك حاجه تطلبها عند اللول ممكن تجرّب السمك الدنيس المقلي مع طاجن صبيط حلو كده. 

زفير

مطعم زفير قريب من أسماك اللول، موجود في المكس برضه ومن المطاعم المعروفة في المنطقلة بس برضه للأسف أسعاره غالية حبتين. بس للأمانة تتبيلة السمك و طعمه بشكل عام مميز جداً في مطعم زفير وده مش رأينا بس ده رأي أكّيلة كتير جربوه وعجبهم. 

أطلب ايه من زفير؟

ممكن تجرّب السمك الدنيس المشوي على الفحم وكمان انصحك تجرّب السمك البربون والموسى هيعجبوك جداً.