أفضل مطاعم سوري في الإسكندرية


انتشرت مؤخراً مطاعم سوري كتير على مستوى مصر وفي الاسكندرية بالتحديد، والحقيقة ان فيه كتير منهم بيقدّمو أكل سوري زي الشاورما والفتة وغيرهم من الأكلات السورية بجودة حلوة جداً وأسعار نسبياً معقولة. عشان كده في المقالة دي قررنا نعرضلكم أفضل مطاعم سوري في الإسكندرية من وجهة نظرنا.

أفضل مطاعم سوري في الاسكندرية

المطاعم اللي هنتكلم عنها في المقالة دي رأينا الشخصي او آراء الأكيلة اللي عايشين في الاسكندرية، بس في الاخر هي آراء شخصية ومش كل الناس هيعجبهم نفس المطاعم. انا في المقالة دي مش بتكلّم عن مطاعم سوري بالتحديد ولكن بتكلّم عن مطاعم شاورما بشكل عام. يلا بينا نبدأ.

رغيف شاورما 

رغيف شاورما من المطاعم اللي اتشهرت مؤخراً بالشاورما المصري والسوري والبوكسات والعروض القوية. عندهم فرعين واحد في محطة الرمل والتاني في سموحة. بالرغم من الزيادات في الاسعار اليومين دول بس رغيف شاورما لسه بيقدّم عروض و وجبات مناسبة للأعداد الصغيرة والكبيرة. الفرع اللي في محطة الرمل مناسب جداً للعائلات و هتلاقي بوكسات عائلية حلوة جداً كطعم وأصناف وأسعارها نسبياً معقولة.

أطلب إيه من رغيف شاورما؟

لو رايح مع عيلتك او صحابك يبقى الخيار الأنسب ليكم هيكون البوكسات زي مثلاً الفاميلي بوكس اللي بيكون فيها 6 حواوشي لحمة و اتنين شاورما فراخ وواحد شاورما لحمة وواحد شاورما كريسبي وبطاطس وعيش محمر.

اقرأ ايضاً: أفضل مطاعم في جرين بلازا الاسكندرية

بمزاج – Bmazag

بمزاج مش مطعم سوري بس بيقدّم شاورما في عيش مميز جداً ومن الحاجات اللي انصحك تجربها. المطعم موجود في سموحة قريب من عصير مكة. بصراحة أسعاره غالية شوية ودي من العيوب الواضحة بس الطعم والتجربة بشكل عام حلوة وتستاهل انك تجربها. 

أطلب إيه من بمزاج؟

عشان تبقى جرّبت اللي هما مميزيين فيه لازم تدوق ساندوتش شاورما بمزاج فراخ و شاورما بمزاج لحمة ودي بتبقى سندوتشات شاورما في عيش مختلف ومميز وهيعجبك جداً.

فيروز – Fayrouz

فيروز من المطاعم اللي بتقدّم أكل سوري بيعجب أغلب الناس اللي بتجرّبه. له فرعين واحد في محطة الرمل والتاني في سموحة ورا محطة سيدي جابر بتاعت القطر. فيروز بقاله حوالي 3 سنين مشهور جداً بسندوتشات الشاورما وفتة الشاورما السوري. جدير بالذكر ان آراء ناس كتير جرّبت الفرعين قالو ان فرع محطة الرمل أحلى من فرع سموحة. من المنافسين الأقوياء لفيروز رغيف شاورما اللي اتكلمنا عليه في أول المقالة دي. 

أطلب إيه من فيروز؟

أرشحلك فتة شاورما فراخ وسندوتشات الشاورما فراخ العادي بتاعهم بس لو انت زيي بتحب التومية ممكن تحتاج تزوّد شوية لأنهم بيجيبو مع الفتة علبة تومية صغيرة شوية.

اقرأ ايضاً: أفضل مطاعم في كارفور سيتي سنتر الاسكندرية

السلطان أيوب – Sultan Ayub

السلطان ايوب

السلطان أيوب، واحد من أقدم مطاعم الشاورما في مصر، وبجد بالنسبالي هو من القلائل اللي بيحافظوا على مستوى الطعم ده لسنين طويلة. فكرة الاستمرارية في التحسين والحفاظ على الجودة هي اللي بتميز مطاعم السلطان أيوب. له أكثر من 5 فروع في الإسكندرية، زي فروع سموحة ومصطفى كامل وجليم عالبحر. 

أطلب إيه من السلطان أيوب؟

ممكن تجرب “توستوك”، اللي هو وجبة جديدة شوية عندهم، بتكون ساندوتش شاورما فراخ أو لحمة مع صوص جبنة شيدر. وتقدر كمان تطلب عرض توستوك تيستي بوكس، اللي فيه الساندوتش مع بطاطس و200 ملل من بيبسي كولا.

عترة – 3etra

عترة من المطاعم اللي اتشهرت مؤخراً في الإسكندرية بالبرجر والشاورما. هو مش مطعم سوري بس الشاورما عندهم تحفة عشان كده قولت اتكلّم عنه في المقالة دي. عترة كمان موقعه مميز لأنه يعتبر في نص اسكندرية، هو موجود في ضهر محطة قطار سيدي جابر ناحية سموحة.

الناس اللي جرّبت تاكل عنده قبل كده عارفة ان الجودة بتاعت المكونات الأساسية نادراً ما بتلاقي زيها بالسعر ده. كمان الصوصات و المكونات الاضافية زي المشروم الفريش بيعتبرو من الحاجات المميزة اللي عترة بيقدمها. 

عترة أسعاره ممتازة بالنسبة للجودة لأن صعب اوي تلاقي طعم وجودة حلويين كده بسعر يعتبر قليل زي اللي عترة بيقدّمه. المشكلة الوحيدة في المطعم انه ضيّق شوية يعني فيه حوالي 3 او 4 ترابيزات بس، بس عندهم دليفري.

أطلب ايه من عترة؟

انا ارشحلكم شاورما نشأت فراخ وده بيكون سندوتش شاورما جواه مشروم فريش مشوي وبصل مكرمل وجبنة ورانش صوص وبجد هيفوتك كتير لو مجربتوش.