أفضل مطاعم سوشي في الاسكندرية

لو عايز تاكل سوشي في الإسكندرية، إحنا هنا عشان نساعدك! هنجبلك أحسن مطاعم السوشي، سواء كبيرة أو صغيرة، وعروض حصريه مش هتلاقيها في حتة تانية. انضم معانا على فيسبوك عشان تشوف كل الأخبار والعروض الحصرية بتاعتنا. عيش تجربة السوشي اللذيذة في الإسكندرية!

أفضل مطاعم سوشي في الاسكندرية

كالعادة وزي باقي المقالات، لازم نقول ان مفيش ترتيب معين على حسب الجودة او الطعم، كلها مطاعم جودتها عالية و بتقدّم سوشي مميز يستحق التجربة. يلا بينا نكتشف  أجمد سوشي في اسكندرية!

ري رامن –  Re Ramen

ري رامن -  Re Ramen

اول مطعم حابب اتكلم عنه هو ري رامن لأنه مختلف عن كل مطاعم السوشي سواء في الاسكندرية او على مستوى مصر. ري رامن بيقدّم سوشي بتعديلات مصرية وبأقل أسعار ممكن تتخيلها! الslogan بتاعهم “أكل ياباني … بسعر مصري” ودي حقيقة فعلاً والجميل ان جودة ونضافة الأكل مميزة جداً كمان.

اطلب ايه من ري رامن؟

احنا جرّبنا كذا نوع سوشي بس اكتر نوع عجبنا كان السبايسي ليمون رول Spicy Lemon Roll وطعمه بجد كان جامد اوي وسعره كمان عمرك ما هتتخيله! كمان ري رامن بيقدّم حاجات تانيه زي النودلز الياباني والفرايد رايس والاتنين حلويين جداً وانصحكم بتجربتهم، بالذات النودلز بالسجق😋

اقرأ برضه: أفضل برجر في الاسكندرية

اوك باي –  Oak Bay

اوك باي من مطاعم السوشي اللي ليها فروع في اماكن غير اسكندرية زي الشيخ زايد في القاهرة. مبدأياً كده اوك باي اسعاره تعتبر غالية شوية لأن هو بيعتبر انه بيقدملك تجربة كاملة مش مجرد أكل. كمان المطعم ده هتلاقي عنده ميكسات غريبة وجديدة للسوشي زي سوشي بالدهب، فلو بتحب تجرب طرق جديدة للسوشي غالباً ده هيكون اختيار حلو ليك.

اطلب ايه من اوك باي؟

انا شخصياً مش بحب اوي السوشي الني فا الفرايد بالنسبالي دايماً بيكون الخيار الأفضل. وبما اني بحب الجمبري فا فيه نوعين مقبلات جمبري حلوين وانصحكم تجربو الشريمب كينوا. اما بالنسبة للسوشي فا ممكن تجربو اوكس رول Oak’s Roll او لافا رول Lava Roll.

سوشي كينجدوم –  Sushi Kingdom

سوشي كينجدوم بيجمع بين الجودة العالية والطعم المميز وكمان السعر اللي غالباً مش هتلاقي زيه في معظم مطاعم السوشي في اسكندرية (ما عدا في ري رامن اللي اتكلمنا عنه في الاول 😅). فيه فرعين في اسكندرية واحد في سموحة في شارع النقل والهندسة والتاني في جليم باي.

اطلب ايه من سوشي كينجدوم؟

لو بتحب الاختراعات زيي ممكن تجرّب الشريمب كنافة وهي زي بالظبط ما الاسم بيوحي، رول كنافة جواها جمبري ومن الاختراعات القوية جداً عندهم. نيجي بعد كده للسوشي وهنا اقدر ارشحلكم نيو فيلادلفيا New Philadelphia وهو من الحاجات الجامده اللي هتاكلوها هناك.