أفضل مطاعم فول وطعمية في الشيخ زايد

مفيش فطار أحلى من الفول والطعمية والجبنة بالطماطم مع شوية بطاطس محمرة وبتنجان. الفطار الرسمي ل 90% من الشعب المصري. في المقالة دي هنرشحلك أفضل مطاعم فول و طعمية في الشيخ زايد عشان تفطر الفطار اللي يظبطلك اليوم. 

أفضل مطاعم فول وطعمية في الشيخ زايد

المطاعم اللي هنتكلم عنها كلها عن تجارب شخصية او ترشيحات من أكيلة عايشين في الشيخ زايد سألناهم عن آراءهم لأحلى مطاعم فول و طعمية.

فول نور

مطعم فول نور في 6 اكتوبر مش في زايد بس قولت اني لازم احطه ضمن احلى الخيارات في المقالة دي لأنه قريب جداً من الشيخ زايد. نور بيقدّم كل أطباق وسندوتشات الفول والطعمية بأنواعهم المختلفة بجودة عالية وطعم مميز جداً. وفي رمضان عادةً بيعمل خيم للسحور وبيعمل سحور حلو جداً وسعره معقول.

أطلب ايه من فول نور؟

انا بحب الطعمية أكتر من الفول بالذات الطعمية المحشية، عشان كده طلبي المفضّل من فول نور هي الطعمية كيري سواء طبق او سندوتش. بس بشكل عام السندوتشات عند نور  كلها حلوة جداً وتستاهل التجربة.

اصطباحة

اصطباحة

مطعم اصطباحة موجود في قلب الشيخ زايد في كومباوند بيفرلي هيلز. اصطباحة بيتميز بالشياكة بالنسبة لأنه مطعم اكل شعبي. ومع ذلك اسعاره عادية وجودة الأكل حلوة جداً بس هتحس انك قاعد في مطعم راقي مش مطعم فول وطعمية. اصطباحة كمان بيقدّم أكلات غير الفطار زي الكبدة والسجق والحواوشي ومكرونة كمان، يعني لو حبيت تروح تتغدى هناك هتلاقي خيارات حلوة تختار منها.

أطلب ايه من اصطباحة؟

من الأطباق اللي بتعجبني جداً عند اصطباحة هي الشكشوكة. للي ميعرفش الشكشوكة هي عبارة عن بيض مقلي عيون بالخضار وانصحك تجربها من اصطباحة لو عمرك ما جربتها. 

السُني

“السُني” في الشيخ زايد، المكان ده مش بس فول وطعمية، ده فن فول وطعمية!المطعم موجود في الحي الثالث عشر في مدينة الشيخ زايد قريب من Zed Park، حوالي 5 دقايق بالعربية. كالعادة السُني عنده كل السندوتشات اللي ممكن تتخيلها للفول والطعمية والبطاطس والجبن بأنواعها. 

الأكل مش بس حلو، الأسعار كمان في متناول الجميع زي ما هو متوقع من اي مطعم فول وطعمية عادي.

أطلب ايه من السُني؟

الفلافل الاسكندراني بالنسبالي هي رقم 1 عند السُني، ده اللي هيغير مفهومك عن الفلافل. طعمه بيفوق التوقعات، والقشرة برة مقرمشة والداخل طري و “جوسي” على رأي الfood bloggers المشهورين😅

نور على نور

مع ان مطعم نور على نور ملهوش اي تواجد على السوشيال ميديا وده ممكن بيخليهم أقل شهرة من مطاعم تانية اتكلمنا عنها في المقالة دي، بس ده ميمنعش انهم من مطاعم الفول المميزة جداً في الشيخ زايد. 

المطعم موجود في مول المعز في الشيخ زايد واللي عندنا مقالة لوحدها بتتكلم عن أفضل المطاعم فيه

أطلب ايه من نور على نور؟

انا عادةً بحب اطلب سندوتش فول بالبيض من عند نور على نور. طبعاً هتلاقي حاجات تانية حلوة عندهم بس انا بحب ارشح اللي حسيته مميز من كل مطعم.

طبالي

@lo2ma_s

@Yara Amr ♦️Tabali 8~8.5/10♦️ Wel calories el zeyada di f r2bt @Food with Ramy Soli 😂🙄🤤 lo2malo2maslo2ma_s lo2ma7awlel3alamfimasr tabalimadinaty طبالىمدينبىسحوررمضانramadantabalisuhoorsuhourdahwaladahworththetrend worththetrendormeh eatlikeaprohowtoeatlikeaprotabalilo2maviral fypforyoupageforyoufoodieegypt

♬ وي رمضان 2024 دايما على بالي – Telecom Egypt

اخر ترشيح احب اتكلّم عنه هو مطعم طبالي. انا سبت طبالي في الاخر عشان سعره اغلى شوية من المطاعم التانية فبحس انه مش مناسب اوي للفول والطعمية كسعر. بس للأمانة الأكل والقعدة عندهم حلوة جداً والميزة انك هتلاقي مشروبات حلوة جداّ ممكن تطلبها بعد الأكل زي الايس كوفي والاسبريسو لو انت من هواة الكافيين. 

طبالي موجود في اركان بلازا وله اكتر من 7 فروع تانية في القاهرة زي فرع الزمالك وفرع شارع التسعين في التجمع

أطلب ايه من طبالي؟

انصحك لو بتحب الطعمية زيي تجرّب الطعمية المحشية هالبينو مدخن. غالباً الاختراع ده مش هتدوقه في حتة تانية غير طبالي ويستحق بصراحة انه يبقى واحد من الترشيحات القوية في المقالة دي.