أفضل مطاعم في اسكندرية على البحر


الأكل في اسكندرية بيبقى له طعم واحساس مختلف لما بتكون قاعد في مطعم بيطل على البحر. عشان كده في المقالة دي هنرشح لكم أفضل مطاعم في اسكندرية على البحر من تجاربنا الشخصية ومن وجهة نظر الأكيلة اللي في الإسكندرية.

أفضل مطاعم في اسكندرية على البحر

المطاعم اللي هرشحهالك اختلافها في الأسعار والمناطق ولكن كلهم بيقدمو أكل بجودة عالية وعن تجارب شخصية او تجارب معارف.

بروكسيز – Bruxie’s

بروكسيز - Bruxie's

دي مش اول مرة نتكلم عن مطعم بروكسيز لأننا اتكلمنا عنه قبل كده في المقالة اللي رشحنا فيها أفضل مطاعم برجر في الإسكندرية. واحد من فروع بروكسيز اللي بحبها واللي كمان قريبة من بيتي هو فرع ستانلي عالبحر. بروكسيز مش بيقدّم برجر بس، عندهم مكرونات وأطباق مختلفة حلوة جداً ومناسبة للغدا، وكمان عندهم الفطار مميز بس يعتبر غالي شوية.

 لازم برضه اقول ان الفرع ده مش بيطل على كوبري ستانلي مباشرةً عشان محدش يفهم غلط، هو جمب كوبري ستانلي على طول بس وانت قاعد فيه مش بتكون شايف كوبري ستانلي. القعده فيه حلوة وبيكون عادةً هادي الي حدٍ ما وتقدر تاخد خطيبتك او مراتك هناك وتاكلو أكل مميز وتقعدو قعدة حلوة.

أطلب ايه من بروكسيز؟

محدش مش بيحب البطاطس المحمرة عشان كده اول حاجه ارشحهالك هي الSloppy Joe وده بيكون طبق بطاطس عليه جبنة ولحمة مفرومة و هالبينو. حاجه تانيه ممكن تطلبها للغدا وهو طبق Fabulous Chicken وده بيكون عبارة عن صدور فراخ محمرة و وايت صوص ومشروم وجبنة موتزاريلا.

اقرأ ايضاً: أفضل مطاعم بيتزا في الاسكندرية

كازينو الشاطبي – Casino El Shatby

Crave - Casino elshatby

كازينو الشاطبي من أشهر الأماكن وأحلى الفيوهات اللي ممكن تشوفها في الاسكندرية لو بتدوّر على مطاعم على البحر مباشرةً. كازينو الشاطبي فيه كذا مطعم وكافيه جواه بس ارشحلكم كريف Crave لأنه من المطاعم اللي جودتها عالية جداً وليها فروع كتير على مستوى مصر.

كريف عندهم منيو فيه اوبشنز كتير جداً وكل حاجه هتيجي على بالك غالباً هتلاقيها موجودة عندهم. 

أطلب ايه من كريف في كازينو الشاطبي؟

لو بتحل الفراخ مع الجبنة زيي يبقى لازم تجرّب التشيكن كوردون ساندويتش Chicken Cordon Sandwich من كريف. و ممكن برضه تجرّب الزومبي برجر Zombie Burger ولازم تدوق الصوص اللي بيجي معاه عشان بالنسبالي الصوص ده احلى حاجه فيه.

البركة – El Baraka

البركة - elbaraka

البركة من المطاعم المقربة لقلبي لدرجة اني اخر 10 مرات طلبت فيهم اكل من برة كان 6 او 7 مرات منهم البركة بدون اي مبالغة. البركة عنده فرايد تشيكن بالنسبالي احسن من كنتاكي ومن اي فرايد تشيكن هتاكلها في مصر. الفراخ نضيفة جداً والتتبيلة مميزة والسعر يعتبر معقول جداً لو هتقارنه بكنتاكي او غيره من مطاعم الفرايد تشيكن المعروفة. فرع البركة اللي عالبحر موجود في كامب شيزار، بصراحة انا عمري ما قعدت في الفرع نفسه بس دايماً بطلب من البركة و هو حالياً المطعم المفضّل بالنسبالي في الاسكندرية بشكل عام.

أطلب ايه من البركة؟

انا دايماً بجيب وجبة البركة اللي بتكون نص فرخة مقلية ومعاها بطاطس و عيش كايزر و ثومية و كولسلو. البركة برضه عنده وجبات ستريبس سواء 3 قطع أو 5 قطع وبرضه بيكون معاهم بطاطس وعيش.

اقرأ ايضاً: أفضل مطاعم تيفولي دوم في الاسكندرية

سان جيوفاني – San Giovanni

سان جيوفاني - San Giovanni

سان جيوفاني هو فندق ومطعم على البحر في منطقة ستانلي و أهم مميزاته القعدة اللي بتطل على كبري ستانلي وكمان جودة الأكل حلوة جداً وتستحق التجربة. مطعم سان جيوفاني مناسب جداً للقعدات الرومانسية او القعدات العائلية الهادئة. بالنسبالي سان جيوفاني بيقدّم احلى قعده وview للبحر في القائمة دي بس اسعاره اغلى من باقي المطاعم اللي اتكلمت عليها في المقالة دي. ولو عايز ترشيحات تانية لأماكن تانية ممكن تقعد تاكل فيها على البحر في ستانلي فيه Pablo و قهوة سلطنة ستانلي.