أفضل مطاعم في تيفولي دوم الإسكندرية

لو بتدوّر على أماكن فيها قعدة حلوة على البحر وفيها مطاعم و كافيهات كتير يبقى تيفولي دوم اسكندرية هيبقى اختيار مناسب. في المقالة دي، هرشحلك 5 مطاعم مميزة في تيفولي دوم عشان متبقاش محتار وانت هناك.

أفضل مطاعم في تيفولي دوم الإسكندرية

كالعادة، المطاعم في القائمة دي مش بترتيب الأفضل ولكن كلهم مطاعم وكافيهات عجبتنا جداً لما جربناها. يلا بينا نشوف.

زانيليس – Zanilli’s

زانيليس من المطاعم القديمة واللي سمعتها حلوة في الإسكندرية وليهم 4 فروع. زانيليس موجود من 2006 يعني بقاله حوالي 20 سنة بيقدّم أكل وخدمة مميزة لأهل الإسكندرية. فروعه موجودة في تيفولي دوم، كارفور سيتي سنتر، المنتزة، و نادي سبورتنج واللي يعتبر من أقدم وأحلى الفروع بالنسبالي.

أطلب ايه من زانيليس؟

ميزة زانيليس انه مفيش طبق او أكلة معينة بيعملها احلى من باقي الأطباق من وجهة نظري. يعني مثلاً لو عايز بيتزا وباستا فهتلاقي عند زانيليس خيارات حلوة وجودة ممتازة. ولو عايز سندوتشات او برجر او اطباق رئيسية سواء فراخ او لحمة فكل ده هتلاقيه بجودة حلوة جداً في زانيليس.

لبش – Labash

لو بتحب التجارب المختلفة في الأكل او لو انت من هواة انك تاكل بإيدك وتعمل ميكسات وسندوتشات بالصوصات اللي تحبها على مزاجك يبقى لبش هو المطعم المناسب ليك. بالنسبالي لبش زي ما اسمه بيوحي بيبقى فيه لبش و تحس انك مش عارف تاكل ايه ولا ايه من طريقة التقديم والصوصات الكتير اللي بتتقدّم مع الأكل، مش هعرف اوصفلك بس الصورة اللي فوق هتوصلك قصدي ايه😅 المهم اني المرتين اللي جربت فيهم لبش كان الأكل طعمه حلو جداً وحبيت النظام المختلف في تقديم الأكل.

أطلب ايه من لبش؟

انا الكام مرة اللي جربت فيهم لبش دوقت السيخ لبش برجر و سيخ لبش فراخ وكان طعمهم حلو جداً بالذات مع صوص التومية السبايسي. اللي نفسي اجربه هو الكفتة فرايد تشيكن و فراخ الباربكيو. 

اقرأ أيضًا: أفضل مطاعم حواوشي في الإسكندرية

جليلة – Jalila

آخر مرة جربت جليلة كان في رمضان اللي فات وبصراحة فاق توقعاتي. كنت متوقع ان زي العادي في رمضان فكرة الفطار برة البيت في مطعم بتكون فاشلة ولكن الحقيقة الأكل جه وقت الآذان وكان سخن وطعمه كان حلو جداً. جليلة أسعاره معقولة نسبياً يعني ولا هتلاقيه سعره حلو اوي وأقل من المطاعم التانية اللي في القائمة دي ولا هيبقى من الغاليين، سعره متوسط وأكله حلو.

أطلب ايه من جليلة؟

لما رحت اخر مرة جبت طبق مكرونة وفراخ بالوايت صوص وعجبوني جداً. مجربتش حاجه تانية من هناك بس أحب اعرف رأيكم لو جربتو حاجه تانيه قولولي تحت في الكومنتات.

كارلوس – Carlos

كارلوس من الأماكن المفضلة بالنسبالي في تيفولي دوم ودايماً بقعد هناك مع صحابي. ميزة كارلوس بالنسبالي ان قعدته في الدور اللي فوق فا الview بيكون خطير بالذات لو رحت الصبح او اي وقت قبل المغرب. حاجه تانيه بحبها في كارلوس ان المنيو بتاعه كبير ومليان حاجات من اول وجبات وأطباق لغاية حلويات ومشروبات متنوعة وكل حاجه جبتها من كارلوس كانت دايماً بتكون fresh ومميزة في طعمها وحتى تقديمها.

أطلب ايه من كارلوس؟

بص يا سيدي، مبيدأياً لو نفسك في بيتزا ممكن تجرّب بيتزا التشيكن باربيكيو. وبما اننا بنتكلم عن الفراخ فا كمقبلات ممكن تجيب تشيكن كاساديا بحبها جداً في كارلوس. لو رحت الصبح او الظهر وعايز تفطر فا ممكن ارشحلك الClub Sandwich برضه حلو ومكوناته بتكون طازة. 

اقرأ أيضًا: أفضل مطاعم مشويات في الإسكندرية

برينسس – Princess

مطعم Princess شبه كارلوس الي حد كبير من ناحية انه بيقدّم مأكولات ومشروبات مختلفة فهو يعتبر مطعم وكافيه. الحقيقة انا مجربتش Princess غير مرة وجبت وقتها بينزا بيبروني وكانت حلوة جداً.