أفضل مطاعم جرين بلازا اسكندرية 

لو انت في جرين بلازا وبتدوّر على أحلى مطاعم تاكل فيها سواء مع اسرتك او صحابك او حتى لو لوحدك يبقى المقالة دي ليك. هنعرض لكم في المقالة دي أجمد 5 مطاعم في جرين بلازا اسكندرية. 

أفضل مطاعم في جرين بلازا اسكندرية 

جرين بلازا فيها وحواليها مطاعم كتير وغالباً لو انت اول مرة تروح هتحتار تاكل فين، بس في المقالة دي هنساعدك تختار المطعم المناسب على حسب ذوقك.

السلطان أيوب – Sultan Ayub

السلطان ايوب من أقدم مطاعم الشاورما التركي في مصر وبالنسبالي من المطاعم القليلة اللي محافظة على مستواها بقالها سنين. فكرة انك تحافظ على مستوى الأكل لسنين وكمان تحسّن الجودة والطعم دي حاجه مطاعم السلطان ايوب متميزين فيها. السلطان ايوب له اكتر من 5 فروع في اسكندرية من ضمنهم فرع جرين بلازا

أطلب ايه من السلطان أيوب؟

فيه وجبة جديدة نسبياً عند السلطان أيوب اسمها توستوك و هي عبارة عن ساندوتش شاورما فراخ او لحمة وعليهم صوص جبنة شيدر، ممكن تطلب عرض توستوك تيستي بوكس وده بيكون الساندوتش ومعاه بطاطس و200 ملل بيج كولا.

روبرتوز – Roberto’s

روبرتوز هو مطعم ايطالي موجود جوا فندق هيلتون في جرين بلازا. المطعم ده مناسب جداً لو خارج مع خطبيتك او مراتك وعايز قعدة شيك وهادية منغير دوشة وفي نفس الوقت أكل بجودة عالية. عيب روبرتوز بالنسبالي ان أسعاره غالية شوية وده غالباً نظراً لأنه موجود جوا فندق هيلتون. 

أطلب ايه من روبرتوز؟

بما انه مطعم إيطالي فطبعاً أول حاجه هرشحهالك هي المكرونة. المكرونات بأنواعها المختلفة حلوة جداً عند روبرتوز وبرضه البيتزا مخدومة ومكوناتها بتكون طازة و حلوة. بالنسبالي أهم ميزة في روبرتوز هي القعدة الشيك والخدمة الحلوة، الأكل نفسه حلو جداً بس هي القعدة والخدمة هما اللي مميزيين هناك بالنسبالي.

تشاينا هاوس – China House

تشاينا هاوس مطعم بيقدّم أكلات آسيوية وبالتحديد أكلات صينية و يعتبر من أقدم مطام الأكل الصيني في الإسكندرية. هو يمكن يكون اكل شكله غريب شوية بالنسبة لبعض الناس، بس هو فعلا طعمه مختلف ومميز. من اول ما تدخل تحس انك دخلت اى بلد اسيوية من مود المكان والديكور والموسيقى وكمان بيعلموك ازاى تاكل بالعصيان بتاعتهم.

الأكل كمياته حلوة بس بالنسبالي أسعاره كانت غالية شوية. تشاينا هاوس عندهم فرعين فى اسكندرية واحد فى جرين بلازا والثانى في سان ستيفانو.

أطلب ايه من تشاينا هاوس؟

ارشحلك تشاينيز ووك Chinese Wok او سوي ووك Soy Wok الاتنين حلويين جداً. 

بيتزا كوين – Pizza Queen

أمّا بقى لو بتدوّر على مطعم عائلي وبرضه معروف وموجود من زمان يبقى بيتزا كوين هيبقى اختيار مناسب ليك. الأسعار حلوة وفرع جرين بلازا كويس جداً و جودته مميزة. بيتزا كوين فرع سان ستيفانو مؤخراً كان فيه شكاوي شوية ان جودته مش أحسن حاجه بس فرع جرين بلازا مازال الناس بتشكر فيه وبيقولو الجودة معقولة جداً.

بيتزا كوين مش أحلى مطعم في القائمة دي من وجهة نظري بس هو مناسب لو عايز مطعم عائلي وبأسعار معقولة عشان دايماً عندهم عروض. وبصراحة برضه بيتزا كوين بالنسبالي مش من ضمن أفضل مطاعم بيتزا في اسكندرية لأن فيه منافسة قوية جداً زي تشاو بيتزا وتوميتو باي.

أبو راوية – Abo Rawya

أبو راوية المطعم الوحيد في المقالة دي اللي مش موجود جوا جرين بلازا نفسه بس هو قريب جداً من جرين بلازا. هو موجود قدام بوابة جرين بلازا على طول يعني يدوبك تعدي الشارع تبقى وصلت. لو نفسك في مشويات وانت في جرين بلازا يبقى ارشحلك أبو راوية منغير تفكير لأن جودته حلوة وأسعاره كمان كويسة جداً بالنسبة لباقي مطاعم المشويات المعروفة في الإسكندرية

لو هتقارن أبو راوية بقرية عبد الوهاب مثلاٍ فبالنسبالي قرية عبد الوهاب تتفوق بنسبة بسيطة في الكفتة المشوية بس فيه فرق برضه ملحوظ في سعر الكيلو بينهم، عبد الوهاب أغلى.

أطلب ايه من أبو راوية؟

انا اخر مرة طلبت تلت كباب وكفتة من أبو راوية وكان حلو جداً وكمان أخدت خصم 50 جنيه من على ابليكيشن المنيوز. الفراخ المشوية برضه حلوة جداً عند أبو راوية.