أفضل مطاعم كارفور سيتي سنتر في اسكندرية

لو انت في كارفور سيتي سنتر في اسكندرية ومحتار تاكل ايه، المقالة دي هتساعدك تختار أفضل مطعم على حسب ذوقك واللي نفسك فيه. كمان هنرشح لك أطباق جربناها من كل مطعم عشان متحتارش في اختيار الوجبة المناسبة. 

أفضل مطاعم كارفور اسكندرية

هنتكلّم عن مطاعم بتقدّم اطباق مختلفة وأنواع أكل متنوعة عشان تلاقي اللي تحبه اياً كان ذوقك او اللي نفسك فيه. يلا بينا نبدأ.

توميتو باي – Tomato Pie

اتكلمنا عن توميتو باي قبل كده في المقالة بتاعت أفضل مطاعم بيتزا في الإسكندرية. لو نفسك رايحة للبيتزا فالمطعم ده هيبقى الاختيار الأنسب ليك. توميتو باي عنده بيتزا بجودة مميزة جداً من اول العجينة والصلصة لغاية المكونات الطازة اللي بيستخدومها. 

مشكلة توميتو باي بالنسبالي ان اسعاره غالية شوية بالنسبة لمطاعم بيتزا تانية في الاسكندرية. حاجه كمان ان في بعض الاحيان البيتزا مكونتها بتكون قليلة شوية يعني مثلاً السي فوود رانش طعمها رائع بس ساعات بتبقى مش مخدومة كفاية بالنسبالي يعني.

 بس بشكل عام أقدر أدّي توميتو باي تقييم 8/10 بضمير مرتاح عشان بصراحة الطعم والجودة عاليين جداً. 

أطلب ايه من توميتو باي؟

انا بحب الرانش صوص فا دايماً بحب اطلب كريسبي تشيكن رانش Crispy Chicken Ranch او سي فوود سلاب SeaFood Slap.

تشيليز – Chili’s

تشيليز هو سلسلة مطاعم امريكية موجودة في أماكن كتير في مصر وليهم فرع في كافور سيتي سنتر. تشيليز بيقدّم كل أنواع الأطباق والوجبات اللي ممكن تتخيلها. من برجر ومكرونة وسلطات للأطباق الرئيسية زي الستيك والفراخ وغيرهم. طبعاً من عيوب تشيليز الواضحة بالنسبالي انه مش براند مصري وانا بحب اشجّع البراندز المصرية لأن فيه كتير اوي منهم بيقدّمو جودة أكل عالية جداً ومميزة.

برضه عيب تاني لتشيليز ان أسعاره غالية مقارنةً بمطاعم تانية بتقدّم نفس الجودة والطعم. 

أطلب ايه من تشيليز؟

انا من عشاق الجبنة بأنواعها المختلفة وبحب جداً المكرونة فبالتالي بحب اطلب من تشيليز الماك ان تشيز جريلد تشيكن Mac ‘N’ Cheese Grilled Chicken. 

هولمز برجر – Holmes Burger

تشيزي مشروم من هولمز

لو رحت توميتو باي في كارفور هتلاقي نفس المكان بيقدّم برجر من هولمز وده لأن المطعمين تحت نفس البراند او يعني هما ملك نفس الشخص. ودي مش أول مرة نتكلم عن هولمز لأننا اتكلمنا عنه قبل كده في المقالة بتاعت أفضل يرجر في الاسكندرية

هولمز و توميتو باي مطاعم مصرية 100% و لكن جودتهم بصراحة متفرقش حاجه عن المطاعم العالمية وكمان الاختراعات بتاعتهم حلوة جداً وتستحق انك تجربها.

أطلب ايه من هولمز؟

هولمز عندهم وجبة جديدة نسبياً اسمها ميلت بوكس Melt Box وهي عبارة عن 3 سندوتشات صغيرة فيها لحمة مفرومة وجبنة سايحة و هالبينو وبصراحة من أحلى السندوتشات اللي أكلتها الفترة اللي فاتت. عيبها الوحيد انك لو جعان اوي احتمال متشبعش بس برضه انصحك تجربها وابقى ادعيلي 😉

اقرأ ايضاً: أفضل مطاعم على البحر في الاسكندرية

طربوش – Tarboush

لو بتحب الأكل السوري وبالتحديد الشاورما بأنواعها سواء سندوتشات او فتة يبقى هو طربوش. طربوش من المطاعم القديمة في الاسكندرية واللي بيقدّم أطباق شاورما عربي و فتة وسندوتشات ده غير المكرونات والمشويات المميزة عنده. طربوش أسعاره معقولة بالنسبة لباقي المطاعمن اللي اتكلمنا عنها في المقالة دي وبيبقى عنده عروض حلوة عادةً.

أطلب ايه من طربوش؟

انا بحب وجبة الشاورما العربي من طربوش سواء لحمة او فراخ او ميكس. ولو عايز تجرّب حاجه جديدة ومميزة جداً ومش هتلاقيها غير عند طربوش يبقى لازم تجرّب فتة السي فود Seafood Fattah

واحة خطّاب – Wahet Khattab

مع اني بحس ان الأكل البدوي مينفعش غير بالقعدة البدوي بس قلت لازم احط واحة خطاب في القائمة دي. واحة خطاب بيقدّم أكل ومشويات بدوية زي ما الكتاب بيقول ومن أحلى مطاعم الأكل البدوي على مستوى مصر. الموزة الضاني المشوية و الريش و اللحمة الفليتو وكل العظمة دي هتدوقها بجودة عالية وطعم بدوي اصيل في واحة خطاب. 

أطلب ايه من واحة خطاب؟

بص بقا يا سيدي، طبعاً الموزة الضاني دي اساسية عشان تبقى فعلاً أكلت وجبة بدوي محترمة، عندك بقا المكرونة المبكبكة والطرب دول برضه من الأساسيات بالنسبالي. وطبعاً لو بتحب الممبار اطلب طيق جمب الحاجات دي عشان تظبط دماغك.