أفضل 4 مطاعم مشويات في الإسكندرية


لو بتدوّر على أفضل مطاعم مشويات في الإسكندرية يبقى المقالة دي ليك! هتلاقي في المقالة دي ترشيحاتنا لأفضل الأماكن اللي بتقدّم مشويات في الإسكندرية ده غير اننا هنقولك احلى الأطباق والوجبات اللي جربناها من كل مطعم. لو عايز تستمتع بعروض ووجبات حصرية لموقعنا ممكن تدخل على الجروب بتاعنا على الفيس بوك عشان يوصلك كل العروض والتخفيضات على المطاعم المفضلة ليك.

أفضل مطاعم مشويات في الإسكندرية

ترشيحاتنا مش بترتيب معين وكل المطاعم اللي هنتكلم عنها بتقدّم مشويات بأعلى جودة. يلا بينا نبدأ.

قرية عبد الوهاب

قرية عبد الوهاب - أفضل مطعم مشويات في الإسكندرية

أول مطعم هتكلم عنه هو واحد من المطاعم المعروفة واللي سمعتها حلوة جداً وهو مطعم عبد الوهاب. لو انت زيي بتحب الكفتة المشوية فرأيي الشخصي ان عبد الوهاب واحد من أحلى المطاعم اللي هتدوق فيها كباب وكفتة بالذات. طبعاً قرية عبد الوهاب بما انه معروف فمتتوقعش ان الأسعار هتبقى قليلة، هو مشكلته أنه يعتبر غالي طبعاً بس هتاكل لحمة بجودة عالية جداً وطعم فعلاً متميز.

اطلب ايه من قرية عبد الوهاب؟

انا طلبي من عبد الوهاب عادةً بيكون بديهي جداً ومفيهوش حاجه مبتكرة، بحب جداً الكباب والكفتة من عبد الوهاب وكمان الفراخ المشوية عنده تتبيلتها بتعجبني جداّ. ساعات برضه بحب اطلب كلاوي بس يمكن الكلاوي بتاعت بلبع بالنسبالي بتكون طعمها احلى شوية. تقدر تزور صفحة قرية عبد الوهاب من هنا.

أبو راوية

أبو راوية

تاني مطعم هو برضه من المطاعم القديمة واللي سمعتها برضه ممتازة بين الاسكندرانية، وكمان فيه ميزة كبيرة عن قرية عبد الوهاب وهو السعر، أبو راوية لغاية دلوقتي أسعاره معقولة جداً مقارنةً بقرية عبد الوهاب و مطاعم مشويات تانية بنفس الجودة. كمان أبو راوية عادةً بيقدّم عروض من خلال ابليكيشن المنيوز وغيره.

اطلب ايه من أبو راوية؟

أبو راوية عامةً طعم المشويات عنده لا يقل جودة ولا تميز عن عبد الوهاب، بس لو هنتكلم عن ترشيحات شخصية فلازم تجرّب الحمام المشوي. انا يمكن مش باكل حمام كتير بس من الحاجات اللي عجبتني جداً عند أبو راوية كان الحمام. ده غير طبعاً الكفتة المشوية اللي دايماً بجربها عند أي مطعم وبرضه حلوة جداً عند أبو راوية. دي صفحة أبو راوية على الفيسبوك.

ننصحك بقراءة: أفضل مطاعم برجر في الإسكندرية

واحة الجراري

الجراري واحد من المطاعم المفضلة بالنسبالي بشكل عام. مطعم واحة الجراري متخصص في المشويات البدوية اللي غالباً مش هتلاقي حد بيعملها زيه. فيه منافسين له زي قرية هاني وواحة خطاب بس الجراري بالنسبالي متفوق عليهم بشكل ملحوظ. القاعدة البدوي مع الجو الصحراوي مع اللحمة الضاني المشوية بتخليني قاعد اكني في عالم تاني.

اطلب ايه من الجراري؟

ورقة وقلم بقا واكتب ورايا😅 الموزة الضاني هناك أهم وأول حاجه لازم تجربها. اللحمة بتاعتها بتدوب كده وتتبيلتها مفيش زيها. عندك برضه الريش والطرب دول مهمين جداً برضه بالنسبالي. لو ليك في الممبار ابقى اطلب طبق كده يفتح نفسك على الأكل. الكفتة واللحمة الفلتو حلويين برضه عند جراري بس انا بفضّل الريش والموزة أكتر. تقدر تعرف أكتر من خلال صفحة الجراري على الفيسبوك.

مشويات جيمي

لو عايز وجبة سريعة وفي نفس الوقت دسمة وطعمها مميز وكمان سعرها معقول بالنسبة لباقي المطاعم اللي اتكلمت عنها لغاية دلوقتي يبقى “جيمي” اختيار رائع. جيمي بيقدّم سندوتشات مشويات من سجق وكفتة وكلاوي ولحمة وغيرهم. ميزة جيمي بالنسبالي اني بطلبه وانا في البيت بييجي عادةً في خلال نص ساعة او ساعة إلا ربع وبيبقى وجبة سهلة وسريعة. ده رقم جيمي 01201161800

اطلب ايه من جيمي؟

انا دايماً بحب اطلب من جيمي سندوتش الكفتة “الدوبل” او المخصوص. برضه بحب الكلاوي جداً بس مش دايماً بتكون متوفرة عنده بس لما بلاقيها بطلبها. سندوتشات السجق واللحمة حلوة اوي عنده برضه بس انا المفضلين بالنسبالي هما الكفتة دوبل والكلاوي. دي صفحة الفيسبوك بتاعت مشويات جيمي.