لو نازلين مع صحابكم او عيلتكم ورايحين اركان بلازا بس مش عارفين هتاكلو فين، كملو قراية للآخر وهنقول لكم أفضل مطاعم في اركان بلازا عن تجربة شخصية.

أفضل مطاعم في اركان بلازا الشيخ زايد

اركان بلازا من الأماكن اللي اشتهرت جداً خلال السنين اللي فاتت واللي بيزورها آلاف الناس كل الاسبوع، عشان كده قررنا نرشّح لكم أحلى مطاعم تجربوها هناك.

كوكو – Coco

كوكو من المطاعم المميزة جداً في اركان بلازا من حيث جودة الأكل والخدمة. كوكو عندهم 6 فروع في القاهرة في اماكن زي التجمع و هليوبليس ومدينتي. المطعم مناسب لتجمعات الصحاب والعائلات والمنيو بتاعهم فيه كل حاجه ممكن تتخيلها من اول البيتزا والمعجنات و وجبات الأطفال لغاية الأطباق الرئيسية زي الستيك وأنواع اللحمة المختلفة.

أطباق كوكو المميزة

واحد من الأطباق اللي بحبها جداً عند كوكو هو ال تشيكن ميلانو Chicken Milano وهو عبارة عن صدور فراخ محمرة وعليها صلصة مميزة و 3 أنواع جبنة مختلفة وبييجي معاها في نفس الطبق مكرونة ب وايت صوص حلوة جداً.

اضغط على الصورة وإنضم مجاناً الي جروب الفيسبوك الخاص بنا وإستمتع بعروض وتخفيضات خاصة لأعضاء الجروب:

تري بون – Tres Bon

تري بون هو مطعم بالنسبالي شبه كوكو من ناحية ان المنيو عندهم متنوع ومليان حاجات تناسب اي ذوق. المطعم عنده اختيارات كتير جداً سواء للفطار او الغدا او العشا. بالنسبالي بصراحة مجربتش أفطر عنده قبل كده بس هقول لكم ترشيح للغدا او الفطار جامد في الجزء اللي جي. جدير بالذكر برضه ان تري بون له 7 فروع على مستوى مصر، 4 منهم في القاهرة و 3 في الساحل و 1 في تيفولي دوم في الاسكندرية.

أطباق تري بون المميزة

انا بحب أطباق الفراخ سواء محمرة او مشوية اللي بيكون فيها اي نوع من الجبنة، عشان كده هرشحلكم تطلبو كوردون بلو Cordon Bleu من تري بون اللي بيكون عبارة عن صدور فراخ محمرة محشية رومي مدخن وجبنة شيدر. 

اقرأ ايضاً: أفضل مطاعم امريكانا بلازا الشيخ زايد

ويلوز – Willow’s

مطعم ويلوز ملوش فروع غير في اركان بس من المطاعم اللي تجربة الأكل فيها جميلة جداً وأطباق الحلو عندهم لازم تجربوها برضه. زي المطعمين اللي فاتو، ويلوز عنده منيو كبير وفيه كل اللي هييجي على بالك. في رأيي ان ويلوز متميز اوي في المكرونات و الحلويات، والمعجنات بشكل عام. ويلوز كمان بيقدّم نولدز على الطريقة الآسيوية ولو ليك في النودلز هيعجبك جداً.

أطباق ويلوز المميزة

زي ما قلت اني بحب المكرونات عند ويلوز عشان كده رأيي انكم لازم تجربو الكريمي بيستو باستا Creamy Pesto Pasta من ويلوز وبيكون في الامكانية انكم تضيفو عليها فراخ او جمبري. 

مايز – Maze

مايز زي ويلوز ملوش اي فروع حالياً غير في اركان بلازا. وبرضه زي ويلوز والمطاعم التانية اللي اتكلمنا عنها في المقالة دي من حيث التنوع في المنيو والأطباق المختلفة اللي بيقدّمها. المنيو بتاع مايز ممكن تتوه فيه شوية لأن هما بيكتو اسامي ساعات بتكون مش مفهومة شوية بس عامةً يعني الأكل حلو جداً والمعجنات زي البيتزا والمكرونة والمناقيش بالذات حلويين جداً فا انصحكم تجربوهم. 

أطباق مايز المميزة

من الأطباق الغريبة وفي نفس الوقت مميزة وحلوة جداً عند مايز هو The Medley Manouche وهي شبه المناقيش السورية بس طولها حوالي 60 سم و متقسمة 3 أجزاء أساسية، جزء بجبنة عكاوي و جزء بالزعتر والخضار وجزء باللحمة. 

كريف – Crave

كريف من المطاعم الكبيرة والمعروفة في مصر واللي ليهم حوالي 9 فروع في محافظات الاسكندرية والقاهرة. مش محتاج اقول برضه ان كريف المنيو بتاعهم كبير زيه زي باقي المطاعم اللي اتكلمنا عنها في المقالة دي. كريف عنده أطباق بيف قوية ومميزة جداً والطبق اللي هرشحه في الفقرة اللي جاية هيبقى من منيو أطباق اللحوم بتاعهم.

أطباق كريف المميزة

فيليه اويستر صوص Fillet Oyster Sauce هو واحد من الأطباق اللي بعتبرها تحفة فنية عند كريف. هو عبارة عن رز مع شرايح لحمة مشوية و صوص المحار مع الفلفل الملون والبصل والمشروم، ويقدم مع بصل سوتيه و رز و خضار سوتيه.

اقرأ ايضاً: أفضل 9 مطاعم في Capital Promenade

فيلا كراكاس – Villa Caracas

فيلا كراكاس هو مطعم متخصص في الأكل اللبناني وليهم 4 فروع في القاهرة و فرع في مراسي في الساحل الشمالي. خيارات الأكل اللبناني مش كتير فلو عايز تجرّب أكل لبناني حلو وعلى اصوله في اركان يبقى فيلا كراكاس هو الخيار المناسب ليك. المعجنات بالنسبالي هي من أقوى الحاجات في المطعم اللبناني بشكل عام. 

أطباق فيلا كراكاس المميزة

في قائمة الأطباق الخاصة في المنيو بتاعهم هتلاقي حاجه اسمها كفتة باللبن Kafta bel laban وهي واضح من اسمها انها حاجه غريبة بالنسبة للمصريين بس فعلاً طعمها رهيب.

بيتر سويت – Bitter Sweet

بيتر سويت من المطاعم اللي بتقدّم معجنات بأنواعها المختلفة سواء الحادق منها او الحلو. ليهم فرعين واحد في اركان والتاني في المتحف المصري الكبير. وبما انه مطعم متخصص في المعجنات يبقى اول حاجه لازم نجيب سيرتها هي البيتزا طبعاً، البيتزا عندهم حلوة جداً ومختلفة وتستاهل التجربة. 

أطباق بيتر سويت المميزة

بما اني من محبين البيتزا يبقى لازم ارشحلكم ال كلاسيك اوتومان بيتزا Classic Ottoman Pizza وهي بتكون عجينة بيتزا مشوية بشكل مثالي ومغطاة بالسجق البقّالي و جبنة  و طماطم وبيضتين مسلوقتين ورشة من الزيت المتبل.

أضف تعليق